Twahirwa, umuhinzi w’urusenda winjiza ibihumbi 360 mu cyumweru

Umusore witwa Twahirwa Dieudonné utuye mu Kagari ka Ramiro, Umurenge wa Gashora, mu Karere ka Bugesera, avuga ko yiteze kujya abona inyungu ya miliyoni eshatu buri kwezi akuye mu rusenda yahinze kuri hegitari ebyiri z’ubutaka.

Kugeza u bu urusend rwa Twahirwa rumuha hafi ibihumbi 360 Frw mu cyumweru.

Twahirwa w’imyaka 28 y’amavuko yize ibijyanye n’ubuhinzi muri Kaminuza y’u Rwanda, ahava afite umuhigo ko igihingwa cyose gishobora kumubyarira inyungu atabura kugihinga.

Nyuma yo kurangiza amasomo ye mu mwaka wa 2012, muri 2013 yaje kubona akazi k’igihe gito (amezi atatu) mu ruganda Horizon Sopyrwa ruhinga ibireti rukanabitunganya ,karangiye yinjira mu bikorwa by’ubuhinzi.

Mu kiganiro na IGIHE, yavuze ko yatangiye ahinga inyanya na watermelon ku bufatanye na mugenzi we, buri wese atangije ibihumbi 500 by’amafaranga y’u Rwanda, ariko ngo yaje kubireka bitewe n’ihindagurika ry’ibiciro ku masoko ku buryo yabonaga bitangiye kumugusha mu gihombo.

Ati″Nashoboraga gukura miliyoni esheshatu mu nyanya kuri hegitari imwe ,ariko uko ibiciro byahindagurikaga wasangaga nshobora kubona na miliyoni ebyiri n’igice.”

Hagati muri Werurwe uyu mwaka nibwoTwahirwa yatangiye ubuhinzi bw’urusenda ku gishoro cya miliyoni eshanu utabariyemo ibikoresho.

Ni ubuhinzi akorera mu Murenge wa Gashora hafi y’ikiyaga cya Mirayi, kugeza ubu aruhinga ku buso bwa hegitari ebyiri, imbuto akaba yaraziteye kuva tariki ya 15 Werurwe kugera muri Mata uyu mwaka.

Twahirwa na we arasarura urusenda rwe

Yavuze ko ubusanzwe urusenda rwera neza nyuma y’amezi atatu ariko ko amaze gusarura inshuro inye kandi ngo uko asaruye ni nako umusaruro ugenda wiyongera.

Mu cyumweru cya mbere asarura yabonye ibiro 160,ubwa kabiri abona ibiro 410, kandi ngo asarura buri cyumweru.

Mu cyumweru gishize yabonye ibiro bisaga 600 (ni ukuvuga ibihumbi 36 000 Frw) ku buryo ateganya kubona ibiro 800 muri iki cyumweru gusa, kandi ntabwo urusenda rwose yahinze ruratangira kwera.

Ku kibazo cy’isoko, yatubwiye ko kugeza ubu afitanye amasezerano n’ikompanyi″ Nature Fresh Foods Lt”yo kuyigemurira urusenda yasaruye, aho ikiro kimwe akigurisha nibura ku mafaranga 600. Iyi kompanyi irwohereza mu mahanga.

Mu gihe azaba atangiye gusarura hegitari ebyiri zose yahinze, arateganya ko buri cyumweru azajya abona toni ebyiri z’urusenda, bivuze ko ashobora kugurisha urusenda rwa miliyoni imwe n’ibihumbi 200 buri cyumweru, akabakaba miliyoni eshanu ku kwezi.

Twahirwa avuga ko ashobora kujya abona inyungu ya miliyoni eshatu z’amafaranga y’u Rwanda yakuyemo imishara y’abakozi n’ibindi byose atakaza birimo kugura amavuta yo gushyira muri moteri(generateur) imufasha kuzamura amazi yo kuhira,imiti n’ibindi.

Ati″Nintangira gusarura neza izi hegitari ebyiri hose hameze neza, miliyoni eshatu z’inyungu nshobora kuzibona ku kwezi kuko n’ibintu bigaragara mu gihe ikiro kimwe nkigurisha amafaranga 600.”

Yemeza ko nk’ubu mu gihe cyo gusarura akoresha abakozi babarirwa hagati ya 25 na 30, ariko ko mu gihe cyo guhinga yashoboraga gukoresha n’abagera mu 100.

Mu kiganiro IGIHE yagiranye n’uyu musore imusanze mu murima we kuri uyu wa Gatatu ubwo abakozi be bari mu bikorwa byo gusarura, yasabye abantu kudasuzugura umurimo uwo ari wo wose wabateza imbere.

Ati″Guhinga ni akazi gashobora kukwinjiriza amafaranga kandi ntibisaba kuba usa nabi ukora mu bitaka. Ni ikintu cya mbere nakangurira abantu kuko kizana amafaranga mu gihe gito kandi ushobora guhera ku gishoro gito mu kubukora cyangwa ukanifatanya na mugenzi wawe. Abantu bakwiye guhindura imyumvire yo gutinya gukora ibintu cyangwa kuvuga ngo ntibajya gukorera mu cyaro kuko ubuhinzi ushobora kubukora ugamije ubucuruzi.”

Yongeyeho ati″Urubyiruko ni rwinshi mu gihugu, imirima ni myinshi kandi baramutse batinyutse ubuhinzi bwatera imbere. Gusa hari n’ahandi henshi hari amahirwe yabyazwa umusaruro, nko mu bworozi bw’inkoko n’ahandi.”

Mu mbogamizi avuga ko agihura nazo harimo gushakira mu gihugu imwe mu miti yo gutera mu rusenda ukayibura, kubura abakozi mu gihe abaturage bagiye mu mirima yabo, n’inyungu nke ugereranyije no mu bindi bihugu bituranyi.

Afite abakozi benshi akoresha

Afite moteri izamura amazi yuhiza urusenda rwe

Abakozi buhira urusenda rwa Twahirwa

Hari urwo yateye rukiri ruto

Atanga akazi ku bakozi batandukanye bamusarurira

Ahinga ubwoko butandukanye bw'urusenda

Urusenda rumaze gusoromwa rushyirwa hamwe

Uko rusenda rwa Twahirwa rupfunyikwa

Twahirwa aravuga ko urusenda rwe rumwinjiriza amafaranga menshi

 

source:igihe.com

Add new comment

1 + 3 =