Ubuzima butangaje bw’ifarashi

farashi, inyamaswa ziboneka hake muri Afurika, ubu zisigaye zororwa mu Rwanda n’abazishoyemo imari mu myidagaduro na siporo, gusa abazoroye bemeza ko ari inyamaswa zifite ubuzima butangaje ugereranije n’inyamaswa zisanzwe zororwa n’Abanyarwanda.

Kuba hari umubare munini w’Abanyarwanda batarabasha kubona ifarashi mu buryo bw’imbonankubone uretse ku zibona mu bihugu by’amahanga bakoresheje ibyuma by’ikoranabuhanga, inkuru dukesha ikinyamakuru igihe.com, cyasuye  hamwe muri hake borora izi nyamabere maze tubakusanyiriza byinshi ku buzima bwazo.

Mu icukumbura ku buzima bw’ifarashi, twifashishije Nkabandi Geleon, ni umwe mu banyarwanda bake bazi gutwara ifarashi ndetse akaba anabyigisha mu buryo bw’umwuga, ndetse byiyongeyeho akaba azikurikiranira hafi umunsi ku munsi ahitwa Rugende mu karere ka Rwamagana.

Nkabandi avuga ko izi nyamaswa uretse abazorora mu buryo bw’ishoramari, bitoroshye kuzigondera kuko ibiciro byazo bihanitse cyane kuko imwe igura amafaranga y’u Rwanda abarirwa hagati ya miliyoni enye na miliyoni icumbi, gusa ibiciro bigasumbana bishingiye ku bwoko bwazo, ibara ryazo ndetse n’imyaka yazo.

Kuba izi farashi zihenda cyane, bunatuma abakeneye kuzikodesha nabo bacibwa amafaranga atari make, ugereranije n’amafaranga akodesha imodoka mu Rwanda kuko ifarashi kuyicaraho isaha imwe ari amafaranga y’u Rwanda 20,000, mu gihe ayamafaranga hari aho akodesha ivatiri ya gikumi umunsi wose.

Nkabandi agira ati “Igiciro cy’ifarashi ubwacyo si imbogamizi ku banyarwanda bazishoramo imari, magingo aya ikikigaragara nk’imbogamizi ni ukubona ibikoresho byazo birimo inkweto zambara zisaba kuzitumiza mu mahanga, kuba abantu bataramenya ko mu Rwanda zihaba ngo baze kuzikodesha n’ibindi.”

Dore ibintu 10 ukwiye kumenya ku ifarashi

1.Ifarashi ntiryama

Ifarashi imara igihe cyose cy’ubuzima bwayo ihagaze, ndetse ngo igihe ishatse kuruhuka cyangwa gusinzira ihagarara hamwe ubundi ikabirangiza. Abazorora bemeza ko ifarashi ishobora iryama gusa iyo ikiri nto cyane kandi nabwo igihe gito, iyo irwaye ndetse n’igihe irimo kubyara.

Kuba ifarashi itaryama bituma inagira ikirano gitandukanye n’ibyayandi matungo, ahubwo ikagira ikiyifasha guhagarara bita “Stable”.

2.Ifarashi igira igisa no kujya ‘mu muhango’ ku bantu

Aborora ifarashi bavuga ko buri kwezi ifarashi igira imihindagurikire y’ubuzima bw’imyororokere, icyitwa kujya mu mihango ku bantu. Mu gihe cyose ifarashi iri muri iki gihe igira imyitwarire yihariye nko kuba itakwemera ko umuntu ayigendaho, kwiheza mu zindi ikazigendera kure n’ibindi.Ibi bihe ifarashi ibimaramo iminsi ine.

3.Ifarashi y’ingabo igira igitsina kirekire kurusha izindi nyamaswa

Nk’uko Nkabandi Geleon yabitangarije IGIHE, ngo ifarashi y’ingabo igira igitsina kirekire cyane, ku buryo yemeza ko nta yindi nyamaswa iyirusha cyangwa binganya.

4.Ifarashi y’ingabo ntitwara abantu nk’ingore

Ifarashi y’ingabo ngo muri kamere yayo ntitwara abantu ndetse ngo ugerageje kuyigendaho ashobora guhura n’ibyago bikomeye, birimo kuba yamukoresha impanuka kuko yo itumva amabwirira y’uyitwaye nka ngenzi yayo y’ingore.

Abazorora bemeza ko uburyo bushoboka bwo kuyigendaho ari ukuyikona ikiri nto ntikurane imyumvire ya kigabo, bitaba ibyo akazi kayo kakaba ako kwimya gusa.

5.Ifarashi irikinisha igashira irari ryo kwimya

Umukozi uhora hafi ifarashi twasuye yemeza ko bitewe n’uko baba batifuza ko ifarashi zibyara uko zibonye, habaho gahunda yo kuzigenera igihe cyo kwima no kubyara.

Kuba rero ifarashi zigira irari ryo kwimya kimwe n’izindi nyamaswa, bituma igihe zabishatse zishyirwa aho zidashobora kubikora ariko zegeranye, ubundi zigasomana ingabo ikikinisha ikamena intanga, zombi zigashira irari.

6.Ifarashi itwarwa n’amagambo cyangwa ibikorwa

Umuntu utwaye ifarashi aba afite uburo bwo kuyitegeka icyo ikora akoresheje igikorwa cyangwa amagambo. Urugero ni uko iyo utwaye ashaka kuyihagarika ashobora gufata feri akoresheje imigozi bayitwarisha cyangwa akayibwira ati “Hagarara”.

Ifarashi yumva ururimi rw’aho yakuriye kandi ikumvira umushoferi wayo gusa.Abazikurikiranira hafi bavuga ko mbere y’uko umuntu ayitwara ibanza igafata impumuro ye ikamumenya, kugira ngo imutandukanye n’abandi kabone n’iyo haba ari mu kivunge.

Bitandukanye n’ibinyabiziga, ifarashi n’ubwo itwara abantu igira ubwenge ku buryo iyo igeze ahantu hateza akaga nko mu muriro, mu mwobo n’ahandi idashobota kujyamo ihareba.

7.Ifarashi zubaha igikorwa cyo kwimyana kandi zikabikora ziherereye

Mu gucukumbura iyi nkuru, aborora ifarashi mu Rwanda batubwiye ko bitandukanye na zimwe mu nyamaswa, ifarashimya yimya yiherereye ndetse hagira abayisagarira ikabyihorera kuko yo ibifata nk’igikorwa yubaha kandi kiyitera isoni kugikorera mu ruhame.

8.Ku nshuro ya mbere ifarashi ibyarira amezi asaga 12

Mu bihe bisanzwe, ifarashi ibyarira amezi icyenda kimwe na nyinshi mu nyamabere, gusa ku nshuro ya mbere ikabyarira amezi 12 n’ibyumweru biri, kandi ikonsa nk’uko inka ibikora.

9.Ifarashi zigira umwihariko mu kurya

Ubusanzwe ifarashi zirarisha, gusa nk’uko abazorora babivuga ngo zikenera n’ibindi biribwa nk’impungure, ibisuguti n’izindi ndyo zihariye bijyanye n’akazi k’ingufu ziba zakoze.

10.Ifarashi zambara inkweto

Iyo witegereje ifarashi usanga ifite ibinono nk’iby’inka, gusa ngo iyi nyamaswa iyo igiye kugendwaho yambikwa inkweto z’ibyuma ziyifasha kwiruka ahantu hose nta kibazo cy’uko yakomereka.

Ifarashi zigira amoko menshi ndetse zikanakoreshwa imirimo itandukanye irimo guhinga, gutwara abantu n’ibintu ndetse hakaba n’abazikoresha mu ntambara, cyane izo mu bihe byashize.

Magingo aya ubwoko bw’amafarashi bumaze kugera mu Rwanda ni ubwo kugendaho mu buryo bwo kwishimisha na siporo, hakababo izagenewe kwiruka cyane zikoresha nka kilometer 160 ku isaha, izikorera cyane ndetse n’izibikora byombi.Gusa abazorora kandi bemeza ko ikirere cyo mu Rwanda kitazorohera kuhaba no kuhororokera, ibi bigatuma inyishi zipfa.

Ukurikije ibiciro byo kugura ifarashi twavuze haruguru, wahashingira uvuga ko ifarashi ari yo nyamaswa ihenze kurusha zindi mu Rwanda, nubwo hari abashingira ku madovize ingagi zinjiza bakaba bavuga ko yagura ayarenzeho.Umukozi w’ikigo cy’igihugu gishinzwe iterambere RDB yabwiye IGIHE ko igiciro cy’ingagi ntawakimenya kuko ingagi itagurishwa.

Iyo uyitwaye akoze impanuka akagwa, ifarashi imuzengurukaho imurindira umutekano kugeza azanzamutse akayisubiraho

Ugenda ku ifarashi yambara ibikoresho byabugenewe mu kurinda impanuka

Classification: 

Add new comment

7 + 9 =