Uko wakoresha urubuga ‘Irembo’,ugahabwa serivisi utagiye mu buyobozi

Irembo ni serivisi yatangijwe n’ikigo ‘Rwanda Online Platform Ltd’ ku bufatanye na leta y’u Rwanda ikaba ifasha umuntu gusaba ibyangombwa bitandukanye byaba iby’irangamimerere, iby’ubutaka , ibyo gutwara ibinyabiziga n’ibindi hakoreshejwe ikoranabuhanga rya Internet cyangwa telefoni igendanwa.

 

Kuba harashyizweho iyi gahunda, ni mu rwego rwo kubyaza umusaruro ikoranabuhanga hagamijwe korohereza abaturage kugira ngo be kuvunika bajya mu buyobozi gushaka serivisi bakeneye.

Jules Ntabwoba, Umukozi muri Rwanda Online ari nayo ifite urubuga Irembo agaragaza ko hari uburyo bubiri umuturage wese ashobora gukoresha asaba serivisi bikamufasha kutavunika no gutakaza umwanya.

Ati “Hari uburyo bwo gukoresha telefoni igendanwa uko yaba imeze kose (yaba android cyangwa isanzwe) , ukandika *909# ukagenda ukurikiza amabwiriza nk’uko umuntu agura umuriro cyangwa ikindi cyose kuri mobile money abigenza.”

Ubundi buryo bwa kabiri ni ugukoresha urubuga irembo, www.irembo.gov.rw umuntu akabanza kwiyandikisha noneho yamara guhabwa umubare w’ibanga akajya asaba serivisi aho abishakiye.

Ntabwoba ati “Iyo ugiye ku rubuga irembo ubona ahantu hagusaba kubanza kwiyandikisha , wuzuzamo umwirondoro wawe nka nimero y’indangamuntu na nimero ya telefoni, ubundi ukihimbira umubare w’ibanga uzajya ukoresha aho uri hose kandi ukaba ibanga ryawe, umubare w’ibanga uzajya uwukoresha, uko ushatse kugira serivisi z’ibyangombwa waka muri Leta.”

Ifoto igaragaza intambwe umuntu ukeneye kwiyandikisha ku rubuga Irembo anyuramo

Ibiri kuri iyi foto byuzuzanya n'iby'iyibanziriza

Ntabwoba avuga ko iyo ugenda wuzuza ,bagusaba kwishyura ukoreshe MTN Mobile money, Tigo Cash, Airtel Money, Visa Card cyangwa ukagana ishami rya BK rikwegereye.

Ati “Iyo ushaka nk’icyangombwa cy’uko uri ingaragu bakweretse ko cyishyurwa amafaranga 500 ako kanya ushobora kwishyura,icyo gihe igikurikiraho ni uko uhabwa ubutumwa bugufi bukubwira itariki uzagira aho hantu usaba serivisi gufata icyangombwa wasabye.”

Kugeza ubu umubare w’abasaba serivisi za Leta bakoresheje urubuga ‘Irembo’ barenga ibihumbi 30 ku kwezi , umubare ukiri muto cyane ugereranije n’abagikoresha uburyo butari ubw’ikoranabuhanga bagana inzego basabamo ibyangombwa.

Classification of article: 

Add new comment

2 + 0 =